პეტრე შოთაძის სახელობის თბილისის სამედიცინო აკადემიისა და ეროვნული სკრინინგ ცენტრის თანამშრომლობის ფარგლებში გაიმართა ღონისძიება, რომელიც მიეძღვნა ძუძუს კიბოს პრევენციის შესახებ ცნობიერების ამაღლებას.

ღონისძიების ფარგლებში გამოიფინა თსა-ს სტუდენტების მიერ მომზადებული თემატური პოსტერები ვარდისფერ ოქტომბერთან დაკავშირებით. ამასთანავე, სტუდენტებმა განიხილეს ეროვნულ სკრინინგ ცენტრთან თანამშრომლობით განხორციელებული კვლევის „კიბოს სკრინინგის საყოველთაო გავრცელების ხელშემწყობი პროექტის“ შედეგები და ისაუბრეს კვლევის მნიშვნელობაზე. „ამ კამპანიის მთავარი მიზანი ჩემთვის და ჩემი ჯგუფისთის, როგორც აკადემიის სტუდენტებისთის და მომავალი ექიმებისთვის არის მაქსიმალური ჩართულობა საზოგადოების ცნობიერების ასამაღლებლად. ჩვენი პოსტერის ინსპირაცია ადამიანების ინფორმირებულობაა და ყველაზე დიდი ინსპირაცია სწორედ ის ადამიანები არიან, ვინც ამ დაავადებას ებრძვიან. ვფიქრობ, მნიშვნელოვანია დაავადების პრევენცია, დროულად აღმოჩენა და მკურნალობა. სწორედ ამაში გვეხმარება ვარდისფერი ოქტომბერი“ - კატრინ სონია გაბისი, ინგლისურენოვანი მედიცინის პირველი კურსის სტუდენტი.

პრეზენტაციები ასევე წარმოადგინეს ეროვნული სკრინინგ ცენტრის სამედიცინო დეპარტამენტის ხელმძღვანელმა თამარ სხირტლაძემ და რადიოლოგმა თამარ ნინიკაშვილმა.

შეხვედრის დასასრულს, ფოტოხელოვანმა დავით ქორიძემ წარმოადგინა მისი ნამუშევრები ძუძუს კიბოსგან განკურნებული ქალების შესახებ და ისაუბრა მათ ისტორიებზე. ღონისძიება ემსახურებოდა ხელოვნებასა და მედიცინას შორის კავშირის ხაზგასმას და პაციენტსა და ექიმს შორის ემპათიის მნიშვნელობის წარმოჩენას.

ოქტომბრის თვე (ვარდისფერი ოქტომბერი) ეძღვნება ძუძუს კიბოს შესახებ ცნობიერების ამაღლებას. წლევანდელი სლოგანია „Together We Rise” და კამპანია ფოკუსირდება ისეთ მნიშვნელოვან თემაზე, როგორიცაა ერთმანეთის მხარდაჭერა, რადგან მარტო არავინ უნდა ებრძოდეს კიბოს.