თსა-ში დენდის ნეიროქირურგიული კლუბი იქმნება. კლუბის საქმიანობისა და სამომავლო გეგმების შესახებ ინფორმაცია სტუდენტებს თსა-ს ინგლისურენოვანი მედიცინის მეორე კურსის სტუდენტმა ნათია ბერიძემ გაუზიარა. ნათია ამავდროულად დენდის ნეიროქირურგიის კლუბის სენატორია თბილისის სამედიცინო აკადემიაში.

Walter E. Dandy Neurosurgical Society აშშ-ში 2011 წელს დაარსდა და მისი მიზანია შექმნას საერთო ფორუმი ნეიროქირურგებისთვის, რომელთა ერთობლივი მუშაობა ხელს შეუწყობს, როგორც ქირურგების, ასევე სტუდენტებისა თუ რეზიდენტების განათლებას, დაეხმარება მათ კლინიკური გადაწყვეტილებების მიღებაში და მარტივად ხელმისაწვდომს გახდის უახლეს ინფორმაციას მსოფლიოს სხვადასხვა კუთხიდან.

დენდის საზოგადოების მნიშვნელოვან რგოლს წარმოადგენს სტუდენტური კლუბები, რომელიც უკვე 60-მდე ქვეყანაშია ჩამოყალიბებული. საქართველოც, ერთი წლის წინ, სწორედ ამ ქვეყნების რიცხვს შეუერთდა და მალევე დაიკავა საპატიო ადგილი “დენდის საერთაშორისო ოჯახში”.

დენდის მიზანია საქართველოს მასშტაბით შექმნას აკადემიური გარემო ნეიროქირურგებს, ნევროლოგებს, რეზიდენტებსა და მედიცინის სტუდენტებს შორის. ამ მიზნების მისაღწევად კლუბის ორგანიზებით არაერთი წარმატებული ღონისძიება ჩატარდა, მათ შორის - "თბილისის ნეიროქირურგიული სიმპოზიუმი“, რომლის ჩატარებაც წელსაც იგეგმება.

დენდის მიზანია გააღრმაოს ინტერესი ნეიროქირურგიის და ნეირომეცნიერების მიმართ. სწორედ ამ მიზანს ემსახურება სამედიცინო უნივერსიტეტებში სენატორების არჩევა, რომლებიც დენდის პირდაპირი წარმომადგენლები იქნებიან, უნივერსიტეტებში შექმნიან ლოკალურ კლუბებს და სტუდენტთა ჩართულობით უზრუნველყოფენ სხვადასხვა აქტივობის ორგანიზებას.